ye zarre jinko hum KHak-e-rah-e-manzil samajhte hain

ye zarre jin ko ham ḳhāk-e-rah-e-manzil samajhte haiñ

zabān-e-hāl rakhte haiñ zabān-e-dil samajhte haiñ

jise sab log husn-o-ishq kī manzil samajhte haiñ

buland us se bhī ham apnā maqām-e-dil samajhte haiñ

haqīqat meñ jo rāz-e-dūrī-e-manzil samajhte haiñ

unhīñ ko ham sulūk-e-ishq meñ kāmil samajhte haiñ

hameñ kyuuñ vo jafā-e-ḳhās ke qābil samajhte haiñ

ye rāz-e-dil hai is ko mujrimān-e-dil samajhte haiñ

isī ik jurm par aġhyār haiñ barpā qayāmat hai

ki ham bedār haiñ aur apnā mustaqbil samajhte haiñ

nigāhoñ meñ kuchh aise bas ga.e haiñ husn ke jalve

koī mahfil ho lekin ham tirī mahfil samajhte haiñ

koī maane na maane us ko lekin ye haqīqat hai

ham apnī zindagī meñ ġhaib ko shāmil samajhte haiñ

ye narm-o-nātavāñ maujeñ ḳhudī kā raaz kyā jāneñ

qadam lete haiñ tūfāñ azmat-e-sāhil samajhte haiñ

hukūmat ke mazālim jab se in āñkhoñ ne dekhe haiñ

jigar ham bamba.ī ko kūcha-e-qātil samajhte haiñ

ye zarre jin ko hum KHak-e-rah-e-manzil samajhte hain

zaban-e-haal rakhte hain zaban-e-dil samajhte hain

jise sab log husn-o-ishq ki manzil samajhte hain

buland us se bhi hum apna maqam-e-dil samajhte hain

haqiqat mein jo raaz-e-duri-e-manzil samajhte hain

unhin ko hum suluk-e-ishq mein kaamil samajhte hain

hamein kyun wo jafa-e-KHas ke qabil samajhte hain

ye raaz-e-dil hai is ko mujriman-e-dil samajhte hain

isi ek jurm par aghyar hain barpa qayamat hai

ki hum bedar hain aur apna mustaqbil samajhte hain

nigahon mein kuchh aise bas gae hain husn ke jalwe

koi mahfil ho lekin hum teri mahfil samajhte hain

koi mane na mane us ko lekin ye haqiqat hai

hum apnī zindagi mein ghaib ko shamil samajhte hain

ye narm-o-natawan maujen KHudi ka raaz kya jaanen

qadam lete hain tufan azmat-e-sahil samajhte hain

hukumat ke mazalim jab se in aankhon ne dekhe hain

jigar hum bambai ko kucha-e-qatil samajhte hain