وہ ہے اور مشقِ ظلم رانی ہے

وہ ہے اور مشقِ ظلم رانی ہے

میں ہوں اور ذوقِ جاں فشانی ہے

خاکساروں میں کیوں نہ ہوں مشہور

تیرے کوچے کی خاک چھانی ہے

چشم تر کیوں نہ رہیے مثلِ حباب

ایک ہی دم کی زندگانی ہے

چنے آنکھوں نے خوان لختِ جگر

آہ یہ کس کی میزبانی ہے

سانس لیتے کراہتا ہوں میں

آہ کیا ضعف و ناتوانی ہے

سن مری سر گزشت وہ بولا

کس دوا نے کی یہ کہانی ہے

میرے سوز و گداز کے آگے

شمع خجلت سے پانی پانی ہے

نت یہی جھیکنا ہے اے جوششؔ

جب تلک اپنی زندگانی ہے