تری زلف کا عقدہ جب وا ہوا

تری زلف کا عقدہ جب وا ہوا

نئے سر سے اک فتنہ برپا ہوا

لگایا جبھی اس کی زلفوں کو ہاتھ

لگا کہنے کے کیا تجھ کو سودا ہوا

طلب کرتے بوسہ وہ دل لے گیا

عجب طرح کا یہ تماشا ہوا

نہ تڑپے نہ سسکے نہ دم لے سکے

تری تیغِ ابرو کا مارا ہوا

ترے جوہر تیغ کا کیا قصور

نصیبوں میں جو کچھ لکھا تھا ہوا

دو نا مہرباں مہرباں ہوگیا

اچمبھا ہے یہ کیا تھا اور کیا ہوا

سنانِ مژہ سے ڈراتا ہے کیا

یہ نیزہ تو ہے دیکھا بھالا ہوا

بس اے تیشہ زعم نہ کر کاوشیں

یہ دل کیا ہوا سنگ خارا ہوا

بہ دولت تری عشق جوششؔ کے تئیں

نہ تھا جو گوارا گوارا ہوا