تری طہارت کو شیخ کہہ تو کہاں سے لائیں اک آب جو ہم

تری طہارت کو شیخ کہہ تو کہاں سے لائیں اک آب جو ہم

طواف دل کا ہے قصد ہم کو کریں ہیں آنسو سے نت وضو ہم

بتنگ آئے ہیں زندگی سے رہیں گے خوف و رجا میں کب تک

جو ہونی ہو سو شتاب ہوئے کھڑے ہیں قاتل کے رو بہ رو ہم

رکھے تو جب تک جہاں میں یارب ترے کرم سے امید یہ ہے

رہے نہ مطلق تلاش دولت کریں نہ دنیا کی جستجو ہم

خزاں نے سب کی بہار کھو دی رہا نہ سنبل بچی نہ ریحاں

گلوں کو دیکھا ہوئے پریشاں چمن سے نکلے بہ رنگِ بو ہم

غم و الم نے تو کر رکھا ہے ہمارے چہرے کو زرد جوششؔ

لہو کے آنسو اگر نہ روئیں نہ ہوں محبت میں سرخ رو ہم