یا رب نہ بگولا ہوں نہ میں ریگِ رواں ہوں

یا رب نہ بگولا ہوں نہ میں ریگِ رواں ہوں

کیوں دشت و بیاباں میں میں ہر طرف دواں ہوں

ترغیب نہ دے مجھ کو عبثِ طوفِ حرم کی

محفوظ ہوں اے شیخ میں جدھر ہوں جہاں ہوں

احوال کو مجنوں کے سنا چاہیے مجھ سے

سر تا بہ قدم بید کے مانند زباں ہوں

ہوتی ہے اجل مجھ سے عبث دست و گریباں

بیمار ہوں اس چشم کا بے تاب و تواں ہوں

گو خاک ہوا میں پہ یہی خوف ہے جوششؔ

اب بھی نہ ہوا ایسا کسی خاطر پہ گراں ہوں