bimar-e-mohabbat hun tarsao na surat ko

bīmār-e-mohabbat huuñ tarsāo na sūrat ko

bhūle se kabhī aao tum bhī to ayādat ko

muḳhtār ho tum sāheb jo chāho kaaro lekin

itnā bhī satānā kyā majbūr-e-mohabbat ko

us qādir-e-mutlaq ke bande hī jo ham Thahre

hañste hue sahnā hai har jabr-e-mashiyat ko

jis haal meñ vo rakheñ us haal meñ ham ḳhush haiñ

muddat huī dafnā.e ehsās-e-musībat ko

jo ġham meñ masarrat kī ghulne ko hue paidā

bad-baḳht vo kyā jāneñ ḳhud ġham kī masarrat ko

ik buad-e-ḳhayālī se haT kar ġham-e-furqat kyā

maflūj na hone do ehsās-e-ma.īyat ko

vo pusht-panāhī par aa jaate haiñ quvvat se

chheḌe na koī un ke parvarda-e-nisbat ko

sarkār ke bande kā bas dil hī bhar aanā hai

āñkhoñ kī namī bas hai tahrīk-e-ināyat ko

afsāna-e-hastī meñ muzmar hai haqīqat bhī

bhūlo na kahīñ 'kāmil' tum apnī haqīqat ko

bimar-e-mohabbat hun tarsao na surat ko

bhule se kabhi aao tum bhi to ayaadat ko

muKHtar ho tum saheb jo chaho karo lekin

itna bhi satana kya majbur-e-mohabbat ko

us qadir-e-mutlaq ke bande hi jo hum Thahre

hanste hue sahna hai har jabr-e-mashiyat ko

jis haal mein wo rakhen us haal mein hum KHush hain

muddat hui dafnae ehsas-e-musibat ko

jo gham mein masarrat ki ghulne ko hue paida

bad-baKHt wo kya jaanen KHud gham ki masarrat ko

ek buad-e-KHayali se haT kar gham-e-furqat kya

mafluj na hone do ehsas-e-maiyat ko

wo pusht-panahi par aa jate hain quwwat se

chheDe na koi un ke parwarda-e-nisbat ko

sarkar ke bande ka bas dil hi bhar aana hai

aankhon ki nami bas hai tahrik-e-inayat ko

afsana-e-hasti mein muzmar hai haqiqat bhi

bhulo na kahin 'kaamil' tum apnī haqiqat ko