hai kidhar qibla batao kis taraf sar KHam rahe

hai kidhar qibla batāo kis taraf sar ḳham rahe

merī nazroñ meñ to har sū qibla-e-ālam rahe

zindagī jaisī bhī kuchh ho jo bhī kuchh aalam rahe

dam bhare jā.eñge terā dam meñ jab tak dam rahe

dāġh-e-dil zaḳhm-e-jigar se aur kuchh matlab nahīñ

baat sirf itnī hai koī yādgār-e-ġham rahe

kis ne mahsūsāt kī duniyā ko baḳhshī āgahī

chāhne vāloñ meñ pahle tum rahe yā ham rahe

dīda-e-tar ik alāmat hai hayāt-e-ishq kī

dil meñ ḳhud dhaḌkan rahegī chashm jab tak nam rahe

is hasīñ uljhan se sau sau husn paidā kyuuñ na hoñ

zulf kī har barhamī par jab koī barham rahe

azm-o-istiqlāl hai shart-e-muqaddam ishaq meñ

koī jaada kyuuñ na ho insān us par jam rahe

duur jaanā hai tujhe ik baat sun le duur kī

ḳhush musāfir aañ ki mī-dārad ba-ġhurbat ham-rahe

ban ga.iiñ ḳhud āfat-e-jāñ apnī gūnāgūniyāñ

ishaq ho yā husn har parde ke pīchhe ham rahe

merī pahlī parvarish taqdīs kī āġhosh meñ

qudsiyoñ ke sar bhī 'kāmil' mere aage ḳham rahe

hai kidhar qibla batao kis taraf sar KHam rahe

meri nazron mein to har su qibla-e-alam rahe

zindagi jaisi bhi kuchh ho jo bhi kuchh aalam rahe

dam bhare jaenge tera dam mein jab tak dam rahe

dagh-e-dil zaKHm-e-jigar se aur kuchh matlab nahin

baat sirf itni hai koi yaadgar-e-gham rahe

kis ne mahsusat ki duniya ko baKHshi aagahi

chahne walon mein pahle tum rahe ya hum rahe

dida-e-tar ek alamat hai hayat-e-ishq ki

dil mein KHud dhaDkan rahegi chashm jab tak nam rahe

is hasin uljhan se sau sau husn paida kyun na hon

zulf ki har barhami par jab koi barham rahe

azm-o-istiqlal hai shart-e-muqaddam ishaq mein

koi jada kyun na ho insan us par jam rahe

dur jaana hai tujhe ek baat sun le dur ki

KHush musafir aan ki mi-darad ba-ghurbat ham-rahe

ban gain KHud aafat-e-jaan apnī gunaguniyan

ishaq ho ya husn har parde ke pichhe hum rahe

meri pahli parwarish taqdis ki aaghosh mein

qudsiyon ke sar bhi 'kaamil' mere aage KHam rahe