یہ چمکا آئینہ کا سطح عکس روئے جاناں سے

یہ چمکا آئینہ کا سطح عکس روئے جاناں سے

جبین مہوشاں نے پردہ ڈالا منہ پر افشاں سے

پھنسا ہے جیسے زنداں میں ترا دیوانہ بے کس

خبر لینے کو ہر دم وحشت آتی ہے بیاباں سے

سیہ روزی مری زائل نہ ہوگی بعد مردن بھی

رہے گی شمع روشن گور پر چشمِ غزالاں سے

ہمارا اور تمہارا روح کا ہے ساتھ جینے میں

رہائی جیتے جی ممکن نہیں دونوں کو زنداں سے

برس میں ایک دن شاید تری فرقت میں سوتا ہوں

ہوا ہے عید کا ملنا مرے مژگاں کو مژگاں سے

مقامِ عاشق و معشوق خوش چشم و می بیغش

اسی کو کہیے عیش جاوداں ثابت ہے قرآں سے

ترے دو ٹکڑے ہو جانی میں نقصاں جوہری کا ہے

نہ بحث اے لعل خوش قیمت کسی کے لعل خنداں سے

جلایا شمع نے اس بزم میں فانوس کو اکثر

نہ رہ اے چرخ غافل عاشقوں کی آہ سوزاں سے

پریرو تو نے اپنے لعل رنگیں یاد دلوا کر

خجل شامِ بدخشاں کو کیا شامِ غریباں سے

بندھے سودائیوں سے گر تصور اس بھبھوکے کا

بگولوں کے عوض اٹھنے لگے شعلہ بیاباں سے

چھڑایا مرگ نے کس کس بلا سے کیوں نہیں خوش ہوں

طرب کرتا ہے انسان چونک کر خواب پریشاں سے

خدا جنت نہ دکھلائے مجھے بن تیرے اے کافر

خوش آنا ہوا گر خدمت بھی لینا حور و غلماں سے

رقیب دیو سیرت کے تملق پر نہ جا ہرگز

شہیداؔ ہرمن نے کیا وفا کی تھی سلیماں سے