چودہویں کا چاند نکلا پھیلی گھر گھر چاندنی

چودہویں کا چاند نکلا پھیلی گھر گھر چاندنی

رنج دے گی آج میخواروں کو شب بھر چاندنی

خواب میں جس کو نظر آ جائے تو اے رشک بدر

کیا عجب بالش ہو اس کا چاند بستر چاندنی

چاندنی میں مل گیا وہ سر و قد ہنگام سیر

ہر قدم بنتی تھی جلبابِ مشجر چاندنی

سیر دریا کو نہ آیا گر شبِ مہتاب تو

ڈوب مرتی تیرے غم میں ہو کے مضطر چاندنی

غافلوں کو خضر بتلاتا ہے رستہ شہر کا

جانبِ صحرا ہو دیوانوں کی رہبر چاندنی

منزلِ جوزا میںِ ہرگز ماہ کو حاصل نہیں

پاتی ہے جو کچھ شرف آ کر ترے گھر چاندنی

چاندنی میں شرم سے ہوتا نہیں وہ ہم کنار

وصل کی شب ہوگئی سد سکندر چاندنی

دل شکستہ مستحق تر ہیں ترے انوار کے

آتی ہے ٹوٹے محل میں سن لے اکثر چاندنی

دام لے کر ماہ تیرے برق دنداں سے فروغ

کر سکے ریگِ رواں کو بحر گوہر چاندنی

چاندنی میں تجھ کو کیا کیا خواب شیریں آئی رات

پھرتی ہے گویا ترے آنکھوں میں شکّر چاندنی

وصل کی شب کیا نکالوں اپنے دل کا میں غبار

خوف ہے مجھ کو نہ ہو جائےمکدر چاندنی

پاس پردے کے پڑے رہتے تھے پہروں خاک پر

عاشق اس پردہ نشیں کی ہے مقرر چاندنی

دل مرا تیرے تصور سے ہے وہ قصر طلسم

رہتی ہے آٹھوں پہر جس میں برابر چاندنی

گاہ کوٹھے پر چڑھا تو گاہ نکلا ماہ چرخ

تیرے ہمسایہ کے گھر رہتی ہے اکثر چاندنی

کرتے ہیں کیا کیا تکلف خوبرو بھی بزم میں

جھاڑ سے بلور کے شب تھی مشجر چاندنی

دامنِ پاکاں کو عصیاں سے نہ ہو آلودگی

قرب شبنم سے نہیں ہوتی کبھی تر چاندنی

یاد آتی ہے شہیدیؔ وہ غزل بے اختیار

جب ستاتی ہے مجھے بے روئے دلبر چاندنی