karen aah-o-fughan phoDen-phaphole is tarah dil ke

kareñ āh-o-fuġhāñ phoḌeñ-phaphole is tarah dil ke

irāda hai ki ro.eñ iid ke din bhī gale mil ke

tamāshe dekhte haiñ āj-kal vo raqs-e-bismil ke

sune ham ne bhī ġhairoñ se ye qisse un kī mahfil ke

kahānī meñ tasalsul hai na mauzūñ hai koī qissa

fasāne bhī pareshāñ haiñ hamāre muztarib dil ke

kareñ kyā ġhair se takrār vo nā-ahl-o-nādāñ hai

jo aaqil haiñ va muñh lagte nahīñ be-maġhz-o-jāhil ke

jagah rone kī hai mad.hosh pā kar bāġh-e-ālam meñ

merī ġhaflat pe ye ġhunche bhī ab hañste haiñ khil khil ke

pareshāñ kyuuñ na ho dukhtā huā dil sair-e-gulshan se

ki ahl-e-dard sun sakte nahīñ naale anādil ke

ye bolā dekh kar ā.īna mujh se vo merā ḳhud-bīñ

kaho ḳhush-rū jahāñ meñ aur haiñ mere muqābil ke

bulāyā pahle maqtal meñ kiyā hai zab.h ḳhud mujh ko

qayāmat tak na bhūlūñgā ye ehsāñ apne qātil ke

tujhe mushkil-kushā samjhūñ na kyuuñ kar ai mere 'vāris'

tere hāthoñ se hal hote haiñ uqde merī mushkil ke

ġham-o-rañj-o-alam kā sāmnā 'aughat' na kyuuñ kar ho

ki rāh-e-ishq meñ ye marhale haiñ pahlī manzil ke

karen aah-o-fughan phoDen-phaphole is tarah dil ke

irada hai ki roen id ke din bhi gale mil ke

tamashe dekhte hain aaj-kal wo raqs-e-bismil ke

sune hum ne bhi ghairon se ye qisse un ki mahfil ke

kahani mein tasalsul hai na mauzun hai koi qissa

fasane bhi pareshan hain hamare muztarib dil ke

karen kya ghair se takrar wo na-ahl-o-nadan hai

jo aaqil hain wa munh lagte nahin be-maghz-o-jahil ke

jagah rone ki hai madhosh pa kar bagh-e-alam mein

meri ghaflat pe ye ghunche bhi ab hanste hain khil khil ke

pareshan kyun na ho dukhta hua dil sair-e-gulshan se

ki ahl-e-dard sun sakte nahin nale anadil ke

ye bola dekh kar aaina mujh se wo mera KHud-bin

kaho KHush-ru jahan mein aur hain mere muqabil ke

bulaya pahle maqtal mein kiya hai zabh KHud mujh ko

qayamat tak na bhulunga ye ehsan apne qatil ke

tujhe mushkil-kusha samjhun na kyun kar ai mere 'waris'

tere hathon se hal hote hain uqde meri mushkil ke

gham-o-ranj-o-alam ka samna 'aughat' na kyun kar ho

ki rah-e-ishq mein ye marhale hain pahli manzil ke