زاہد کو خوف کیوں نہ ہو روز شمار کا

زاہد کو خوف کیوں نہ ہو روز شمار کا

قائل نہیں ہے رحمت پروردگار کا

جو چاہتے ہیں ہم وہ مقدر ہی میں نہیں

شکوہ ہے یار کا نہ گلہ روزگار کا

اس سے تو اور بڑھ گئیں کچھ بے قراریاں

وہ پوچھتے نہ حال دلِ بے قرار کا

ہیں میکشوں کے ساتھ ہی زاہد بھی آج مست

اللہ رے فیض عام نسیم بہار کا

رحم آگیا انہیں بھی مرا حال دیکھ کر

ممنون کیوں نہ ہوں ستم روزگار کا

شاہد پرست رند ہو کوثرؔ سا شیخ وقت

کیا اعتبار اب کسی پرہیزگار کا