zindagi thi ek habab aur usko kya samjha tha main

zindagī thī ik habāb aur us ko kyā samjhā thā maiñ

haañ hayāt-e-jāvedānī se sivā samjhā thā maiñ

koī samjhā.e ki āḳhir kyā burā samjhā thā maiñ

un kī laġhzish ko agar apnī ḳhatā samjhā thā maiñ

sādgī kahiye use merī ki husn-e-ittifāq

the vahī qātil jinheñ dard-āshnā samjhā thā maiñ

kuchh ajab māhaul thā merī shab-e-andoh kā

qutub kī āvāz ko terī sadā samjhā thā maiñ

dard-e-dil ko maiñ burā kahtā ye mumkin hī na thā

dard-e-dil ko bhī tumhārī hī atā samjhā thā maiñ

ġhaur se dekhā to paayā us ko shah-e-rag ke qarīb

apnī hī kotāh-bīnī se judā samjhā thā maiñ

sajda-gāh-e-qudsiyāñ sad sajda-gāh-e-ins-o-jin

husn meñ jalva usī kā hai bajā samjhā thā maiñ

ye ġhalat-fahmī na thī to aur phir kyā chiiz thī

ibtidā-e-ishq ko bhī intihā samjhā thā maiñ

zindagī ke saath haiñ betāb saarī kulfateñ

kyā ġhalat thā dard-e-dil ko lā-davā samjhā thā maiñ

zindagi thi ek habab aur us ko kya samjha tha main

han hayat-e-jawedani se siwa samjha tha main

koi samjhae ki aaKHir kya bura samjha tha main

un ki laghzish ko agar apni KHata samjha tha main

sadgi kahiye use meri ki husn-e-ittifaq

the wahi qatil jinhen dard-ashna samjha tha main

kuchh ajab mahaul tha meri shab-e-andoh ka

qutub ki aawaz ko teri sada samjha tha main

dard-e-dil ko main bura kahta ye mumkin hi na tha

dard-e-dil ko bhi tumhaari hi ata samjha tha main

ghaur se dekha to paya us ko shah-e-rag ke qarib

apni hi kotah-bini se juda samjha tha main

sajda-gah-e-qudsiyan sad sajda-gah-e-ins-o-jin

husn mein jalwa usi ka hai baja samjha tha main

ye ghalat-fahmi na thi to aur phir kya chiz thi

ibtida-e-ishq ko bhi intiha samjha tha main

zindagi ke sath hain betab sari kulfaten

kya ghalat tha dard-e-dil ko la-dawa samjha tha main