dil mein pinhan ek tufan-e-sharar rakhta hun main

dil meñ pinhāñ ek tūfān-e-sharar rakhtā huuñ maiñ

bijliyoñ kā apnī aahoñ meñ asar rakhtā huuñ maiñ

saarī duniyā se judā zauq-e-nazar rakhtā huuñ maiñ

ya.anī ḳhud husn-e-azal ko rāhbar rakhtā huuñ maiñ

be-ḳhudī ke saath dil meñ shān-e-ḳhuddārī bhī hai

be-ḳhabar rahte hue apnī ḳhabar rakhtā huuñ maiñ

umr bhar sadmāt-e-hijrāñ se rahā huuñ ham-kanār

ġhāliban siine meñ patthar kā jigar rakhtā huuñ maiñ

kyā batā.ūñ hai kahāñ tak merī parvāz-e-ḳhayāl

arsh se bhī kuchh parai apnī nazar rakhtā huuñ maiñ

ishq kī daulat ba-qadr-e-zarf hāsil hai mujhe mujhe

koī kah saktā nahīñ sat.hī nazar rakhtā huuñ maiñ

ek a.alam se judā hai merā andāz-e-junūñ

bārgāh-e-dost ke zarroñ pe sar rakhtā huuñ maiñ

yaad ko un kī banā rakhā hai maiñ ne rahnumā

apne dil ke saath sham-e-rah-guzar rakhtā huuñ maiñ

chāñd ke jalvoñ se ai 'betāb' go mahrūm huuñ

apne pahlū meñ nihāñ dāġh-e-jigar rakhtā huuñ maiñ

dil mein pinhan ek tufan-e-sharar rakhta hun main

bijliyon ka apni aahon mein asar rakhta hun main

sari duniya se juda zauq-e-nazar rakhta hun main

yani KHud husn-e-azal ko rahbar rakhta hun main

be-KHudi ke sath dil mein shan-e-KHuddari bhi hai

be-KHabar rahte hue apni KHabar rakhta hun main

umr bhar sadmat-e-hijran se raha hun ham-kanar

ghaaliban sine mein patthar ka jigar rakhta hun main

kya bataun hai kahan tak meri parwaz-e-KHayal

arsh se bhi kuchh parai apni nazar rakhta hun main

ishq ki daulat ba-qadr-e-zarf hasil hai mujhe mujhe

koi kah sakta nahin sathi nazar rakhta hun main

ek aalam se juda hai mera andaz-e-junun

bargah-e-dost ke zarron pe sar rakhta hun main

yaad ko un ki bana rakha hai main ne rahnuma

apne dil ke sath sham-e-rah-guzar rakhta hun main

chand ke jalwon se ai 'betab' go mahrum hun

apne pahlu mein nihan dagh-e-jigar rakhta hun main