مجھے جام الفت یار نے جو پلا دیا کئی بار ہے

مجھے جام الفت یار نے جو پلا دیا کئی بار ہے

سویہ آنکھوں میں مری اب تلک بخدا اسی کا خمار ہے

جو صبا کرے تو ادھر گذر تو یہ کہیو ان سے مری خبر

غمِ ہجر نے ترے اے صنم کیا کیسا زار و نزار ہے

ترے عشق میں جو ہوا صنم نہیں اس کا شکوہ کریں گے ہم

چاہو جس طرح کرو خوار تم بخدا مجھے نہیں عار ہے

مری جان جائے تو غم نہیں مگر اتنا کہتے ہیں اے صنم

نہ پھریں گے عشق سے تیرے ہم مرا دل تو تجھ پہ نثار ہے

مجھے خوفِ حشر خلیلؔ کیا کہ ہیں شاہ خادم پیشوا

کوئی مانے یا کہ نہ مانے ہاں مرے دل کو اس پہ قرار ہے