عشق میں غافل نہیں ہیں اے دل دیوانہ ہم

عشق میں غافل نہیں ہیں اے دل دیوانہ ہم

ہر نفس میں کر رہے ہیں شرح صد افسانہ ہم

لب پہ آہ سرد تھی آنکھوں سے تھے آنسو رواں

دل کی بربادی کا یوں کہتے رہے افسانہ ہم

کعبہ جاتے جاتے دل میں آ گیا یہ کیا خیال

راہ کترا کر چلے ہیں جانب میخانہ ہم

جلوہ گاہ ناز میں خود ہی سنبھلنا ہے محال

کس طرح تجھ کو سنبھالیں اے دلِ دیوانہ ہم

رفتہ رفتہ سننے والے بن گئے تصویرِ غم

یوں لب خاموش سے کہتے رہے افسانہ ہم

ہجر ساقی میں ہمارا شغل ہے یہ اے خردؔ

دل کو شیشہ جانتے ہیں آنکھ کو پیمانہ ہم