zeb-e-zamin nahin ki tu zinat-e-asman nahin

zeb-e-zamīñ nahīñ ki tū zīnat-e-āsmāñ nahīñ

aañkh agar nasīb ho jalva tirā kahāñ nahīñ

kahtā huuñ laakh dard-e-dil hotā magar bayāñ nahīñ

aisī zabāñ zabāñ hai kyā dil kī jo tarjumāñ nahīñ

'ishq kī zarb al-amāñ zaḳhm nahīñ nishāñ nahīñ

husn kā bismil ik jahāñ tiir nahīñ kamāñ nahīñ

ahl-e-nazar to saikḌoñ sāhib-e-dil nahīñ koī

husn ke qadr-dāñ bahut 'ishq kā qadr-dāñ nahīñ

apne maqām-e-’ishq kā haaye kahūñ maiñ haal kyā

ġham to yahāñ hazār-hā fursat-e-yak fuġhāñ nahīñ

jazb meñ jab maiñ aa gayā paas hī tujh ko pā gayā

phirtā rahā sulūk meñ jāneñ kahāñ kahāñ nahīñ

jazb meñ kyā bahār hai dil hai jalva-zār hai

maiñ huuñ aur ik nigār hai hosh bhī darmiyāñ nahīñ

zeb-e-zamin nahin ki tu zinat-e-asman nahin

aankh agar nasib ho jalwa tera kahan nahin

kahta hun lakh dard-e-dil hota magar bayan nahin

aisi zaban zaban hai kya dil ki jo tarjuman nahin

'ishq ki zarb al-aman zaKHm nahin nishan nahin

husn ka bismil ek jahan tir nahin kaman nahin

ahl-e-nazar to saikDon sahib-e-dil nahin koi

husn ke qadr-dan bahut 'ishq ka qadr-dan nahin

apne maqam-e-’ishq ka haye kahun main haal kya

gham to yahan hazar-ha fursat-e-yak fughan nahin

jazb mein jab main aa gaya pas hi tujh ko pa gaya

phirta raha suluk mein jaanen kahan kahan nahin

jazb mein kya bahaar hai dil hai jalwa-zar hai

main hun aur ek nigar hai hosh bhi darmiyan nahin