زیب زمیں نہیں کہ تو زینت آسماں نہیں

زیب زمیں نہیں کہ تو زینت آسماں نہیں

آنکھ اگر نصیب ہو جلوہ ترا کہاں نہیں

کہتا ہوں لاکھ درد دل ہوتا مگر بیاں نہیں

ایسی زباں زباں ہے کیا دل کی جو ترجماں نہیں

عشق کی ضرب الاماں زخم نہیں نشاں نہیں

حسن کا بسمل اک جہاں تیر نہیں کماں نہیں

اہل نظر تو سیکڑوں صاحب دل نہیں کوئی

حسن کے قدرداں بہت عشق کا قدرداں نہیں

اپنے مقام عشق کا ہائے کہوں میں حال کیا

غم تو یہاں ہزار ہا فرصت یک فغاں نہیں

جذب میں جب میں آ گیا پاس ہی تجھ کو پا گیا

پھرتا رہا سلوک میں جانیں کہاں کہاں نہیں

جذب میں کیا بہار ہے دل ہے جلوہ زار ہے

میں ہوں اور اک نگار ہے ہوش بھی درمیاں نہیں