nigah-e-aqriba badli mizaj-e-dostan badla

nigāh-e-aqribā badlī mizāj-e-dostāñ badlā

nazar ik un kī kyā badlī ki mujh se kul jahāñ badlā

chaman kā rañg go tuune sarāsar ai ḳhizāñ badlā

na ham ne shāḳh-e-gul chhoḌī na ham ne āshiyāñ badlā

tarīq-e-'ishq meñ go kārvāñ par kārvāñ badle

na ham ne rahguzar badlī na mīr-e-kārvāñ badlā

karūñ kyā dil hai bā-sad zohd-o-taqvā mā.il-e-rindī

jibillat kyā badal saktī 'amal ko apne haañ badlā

kabhī ham kah sake hamdam na khul kar hāl-e-dil un se

ki har lafz apnā sau baar aate aate tā-zabāñ badlā

are tauba koī had hai bhalā is bad-gumānī kī

zarā maiñ paas jā baiThā ki us ne pāsbāñ badlā

bahut go 'ishq meñ 'majzūb' badlā tum ne haal apnā

magar jaisā badalnā chāhiye vaisā kahāñ badlā

nigah-e-aqriba badli mizaj-e-dostan badla

nazar ek un ki kya badli ki mujh se kul jahan badla

chaman ka rang go tune sarasar ai KHizan badla

na hum ne shaKH-e-gul chhoDi na hum ne aashiyan badla

tariq-e-'ishq mein go karwan par karwan badle

na hum ne rahguzar badli na mir-e-karwan badla

karun kya dil hai ba-sad zohd-o-taqwa mail-e-rindi

jibillat kya badal sakti 'amal ko apne han badla

kabhi hum kah sake hamdam na khul kar haal-e-dil un se

ki har lafz apna sau bar aate aate ta-zaban badla

are tauba koi had hai bhala is bad-gumani ki

zara main pas ja baiTha ki us ne pasban badla

bahut go 'ishq mein 'majzub' badla tum ne haal apna

magar jaisa badalna chahiye waisa kahan badla