نگاہ اقربا بدلی مزاج دوستاں بدلا

نگاہ اقربا بدلی مزاج دوستاں بدلا

نظر اک ان کی کیا بدلی کہ مجھ سے کل جہاں بدلا

چمن کا رنگ گو تونے سراسر اے خزاں بدلا

نہ ہم نے شاخ گل چھوڑی نہ ہم نے آشیاں بدلا

طریق عشق میں گو کارواں پر کارواں بدلے

نہ ہم نے رہ گزر بدلی نہ میر کارواں بدلا

کروں کیا دل ہے باصد زہد و تقویٰ مائل رندی

جبلت کیا بدل سکتی عمل کو اپنے ہاں بدلا

کبھی ہم کہہ سکے ہمدم نہ کھل کر حال دل ان سے

کہ ہر لفظ اپنا سو بار آتے آتے تا زباں بدلا

ارے توبہ کوئی حد ہے بھلا اس بد گمانی کی

ذرا میں پاس جا بیٹھا کہ اس نے پاسباں بدلا

بہت گو عشق میں مجذوبؔ بدلا تم نے حال اپنا

مگر جیسا بدلنا چاہیے ویسا کہاں بدلا