گردش میں تخیل کا اثر دیکھ رہے ہیں

گردش میں تخیل کا اثر دیکھ رہے ہیں

منزل کو بھی ہم رنگ سفر دیکھ رہے ہیں

اللہ کا گھر یا ترا در دیکھ رہے ہیں

سجدے میں پڑے سیکڑوں سر دیکھ رہے ہیں

کھلتی ہی نہیں آنکھ جو ان کی شب خلوت

کیا خواب میں وہ غیر کا گھر دیکھ رہے ہیں

اف آخری دیدار بھی میت کا ہے کیا چیز

گودیکھ نہیں سکتے مگر دیکھ رہے ہیں

معلوم ہے ہم کو کہ نہ آئیں گے وہ ہرگز

ہم پھر بھی مگر جانب ِدر دیکھ رہے ہیں

وہ سامنے نظروں کے ہیں اے حضرت مجذوبؔ

اور آپ ادھر اور ادھر دیکھ رہے ہیں

کیا محفل عشاق میں ہے صدر کی حاجت

مجذوبؔ کو سب اہل نظر دیکھ رہے ہیں