میں خراب بادۂ و ساغر رہا

میں خراب بادۂ و ساغر رہا

دل فدائے ساقی کوثر رہا

لب پہ ذکر زمزم و کوثر رہا

دل میں شوق بادۂ و ساغر رہا

رخ کیا میں نے جو دنیا کی طرف

صاحبِ زر بندۂ بے زر رہا

وہ بلا لیتے یہ تھی قسمت کہاں

ذکر میرا بزم میں اکثر رہا

میں رہا تو باغ ہستی میں مگر

بے نوا، بے آشیاں، بے پر، رہا

نفس نے مجھ کو دئیے کیا کیا سبق

رہزنِ عالم مرا رہبر رہا

کوئی سمجھا رند کوئی متقی

لب پہ توبہ ہاتھ میں ساغر رہا

کیوں رہا مجذوبؔ بے غم مجھ سے سن

بے غرض، بے مدعا، بے زر، رہا