وہ کہتے ہیں نہ ظلم اٹھائے جیا کرے

وہ کہتے ہیں نہ ظلم اٹھائے جیا کرے

میں کہتا ہوں کہ مفت کوئی کیوں مرا کرے

ناصح کہے یہ خبط ہے واعظ کہے گناہ

ہم دل تو دے چکے کوئی اب کچھ کہا کرے

ان کو نہ آئے پہلوئے دشمن میں نیند کیوں

ان کو تو شوق ہے کوئی آہیں بھرا کرے

کس درجہ دل کے ہاتھوں پشیمان ہم ہوئے

جان عزیز مفت نہ کوئی فدا کرے

اظہار درد ہجر سے ہو تم کو رنج کیا

تم کو تو دل لگی ہے کوئی کچھ کہا کرے

فرقت میں کوئی دل کو کلیجے کو پھینک دے

پھر روح کو قرار نہ آئے تو کیا کرے

ہو میرے بعد مر گ تو کچھ تم کو قدر عشق

سر پیٹتے تم آؤ تمہارا بھلا کرے

پہنچے نہ اڑکے خاک بھی تا کوچۂ صنم

قسمت ہو نارسا تو کوئی اس کو کیا کرے

کچھ تم شریکِ رنج ہو کچھ کاتبِ ازل

انصاف شرط ہے کوئی کس کا گلہ کرے

آئیں وہ بن سنور کے مرے پھولوں میں حمیدؔ

اللہ ان کو رونقِ بزم عزا کرے