تبسم یار کا باعث ہے اپنے چشمِ گریاں کا

تبسم یار کا باعث ہے اپنے چشمِ گریاں کا

تماشا عشق کی دولت سے ہے یاں برق وباراں کا

یہاں تک ہم نے تیرِ عشق اب سینے میں کھائے ہیں

کوئی دیکھے تو یہ جانے کہ ہے جنگل نیستاں کا

اسے دامن تلک تو پا ؤں پھیلانے دے اے ناصح

نہ کر قصدِ رفو ہرگز مرے چاکِ گریباں کا

نہ پہنچے دل تلک اُس کے جلایا دامنِ گردوں

اثر دیکھا تو یہ دیکھا اس اپنی آہِ سوزاں کا

لگا ہے دست قاتل سے جگر پر زخم یہ کاری

کہ دل پھٹنے لگا جرّاح کا دیتے ہوئے ٹاںکا

نہ تھی یہ چشم تجھ سے کیا کہوں اے آبلہ پائی

کہ منت کش کرے یوں مجھ کو تو خارِ بیاباں کا

عبث تکلیف گلگشت چمن دیتے ہو تم یارو

غمِ فرقت میں خوش آوے تماشا کس کو بستاں کا

کہ گل کو دیکھ کر چاکِ گریباں یاد آتا ہے

رہا غنچہ سو وہ کرتا ہے دل میں کام پیکاں کا

روش پُردرد کے پُردرد کچھ اشعار اب پڑھیے

کہ دلِ مشتاق ہے معروفؔ طرزِ ہر سخنداں کا