عاشقِ صادق ہوں میں تنہا بٹھا کر دیکھ لو

عاشقِ صادق ہوں میں تنہا بٹھا کر دیکھ لو

گر نہیں باور تو اچھا آزما کر دیکھ لو

یہ اگر کچھ سوچتے ہو اس کے تیور اور ہیں

دیدۂ و دانستہ پھر آنکھیں لڑا کر دیکھ لو

گر مزاجِ شوخ کا میرے تمہیں ہے کچھ خیال

تو ہنسی کی بات اب مجھ کو سنا کر دیکھ لو

گر ہے اندیشہ کہ لپٹے گا تو بہرِ امتحاں

خوب سا اپنے گلے کو پھر لگا کر دیکھ لو

یہ اگر ڈر ہو نشہ پی کر کہیں لائے نہ فعل

تو ابھی تم ساتھ اپنے مے پلا کر دیکھ لو

دل میں بوسہ کی طرف سے گر ہو دھچکا آپ کے

تو تو اچھی بات منہ سے منہ ملا کر دیکھ لو

خوف ہاتھا پائی کا گر ہو تو میرے روبرو

دست وپا میں اپنے تم مہندی لگا کر دیکھ لو

گرچہ ہے معروفؔ میری پاکبازی دہرمیں

سب طرح تم دل سے لیکن شک مٹا کر دیکھ لو