سچ تو یوں ہے آپ ہم سے آشنائی کر رکھو

سچ تو یوں ہے آپ ہم سے آشنائی کر رکھو

یا ہمارے ہو رہو یا ہم کو اپنا کر رکھو

جھوٹ کیوں کہتے ہو ہم بے بس ہیں مل سکتے نہیں

لاکھ ڈھب ملنے کے ہیں ملنا اگر جی پر رکھو

خانۂ دل کو نہ ڈھاؤ ہے وہاں بیتِ خدا

اے بتو کچھ تو بھلا دل میں خدا کا ڈر رکھو

دل سے کب جاتی ہے سمجھائے سے اس ابرو کی یاد

ناصحو اپنی نصیحت طاق پر اب دھر رکھو

میں ہوا ہوں یارو ایک پردہ نشیں کے دھیان میں

ہے مناسب گر مجھے تہ خانہ کے اندر رکھو

ایک دل رکھتا ہوں سو بوسہ پہ دیتا ہوں تمہیں

خواہ قیمت میں لگا لو خواہ گر وی دھر رکھو

ہے ارادہ اُن کے گھر چلنے کا شب چوری سے گر

تو سنا معروفؔ منہ درباں کا اُن کے بھر رکھو