گھر تو دونوں پاس ہیں لیکن ملاقاتیں کہاں

گھر تو دونوں پاس ہیں لیکن ملاقاتیں کہاں

آمد و رفت آدمی کی ہے پہ وہ باتیں کہاں

ہم فقیروں کی طرف بھی تو نگاہیں دم بدم

پھینکتے جاتے تھے آپ آگے وہ خیراتیں کہاں

بعد مرنے کے مرے ہوگی مرے رونے کی قدر

تب کہا کیجئے گا لوگوں سے وہ برساتیں کہاں

یوں تو ہے دن رات میرے دل میں اس کا ہی خیال

میں دنوں اپنی بغل میں تھا سو وہ راتیں کہاں

جس طرح سے کھیلتا ہے وہ دلوں کا یاں شکار

دردؔ آتی ہیں کسی دلبر کو وہ گھاتیں کہاں