‎جنوں میں جا رہا ہوں کس طرف کس نے بلایا ہے

‎جنوں میں جا رہا ہوں کس طرف کس نے بلایا ہے

‎کھڑا ہوں دھوپ میں کب سے، نظر سے دور سایہ ہے

‎کہاں جائیں تری الفت کے خالی ظرف لے کر ہم

نبھانا گرچہ مشکل تھا، مگر ہم نے نبھایا ہے

‎فنا ہو کر بھی باقی ہوں، تری یادوں کے سائے میں

اسی اندازِ ہستی نے مرا رتبہ بڑھایا ہے

‎کبھی ہے موجِ طغیانی، کبھی صحرا سی خاموشی

مرے دل کے سمندر نے عجب طوفاں اٹھایا ہے

‎ہم اپنی بے بسی لے کر اگر جاتے کہاں جاتے

سو ہم نے اپنے دل کو ہی سزا دے کر رلایا ہے

‎بہت کچھ لٹ گیا اپنا، بہت کچھ چھن گیا ہم سے

بتاؤ آپ کو کھوکر بھلا کیا ہم نے پایا ہے

‎مری آنکھوں میں اب تک آنسوؤں کی پاسبانی ہے

مجھے اک واقعہ اس نے محبت کا سنایا ہے

‎یہ دنیا بے وفا ہے، بے ثبات و بے حقیقت ہے

یہاں پر مستقل رہنے کی خاطر کون آیا ہے

‎چلو شایانؔ پھر اس منزلِ مقصود کی جانب

جہاں پر عاشقوں نے عشق کا انعام پایا ہے