ہے جان مری ہر دم قربان محبت پر

ہے جان مری ہر دم قربان محبت پر

لائے تھے ہمیں پہلے ایمان محبت پر

یہ دل کی عقیدت ہے یہ شوق کی دولت ہے

کرتا ہوں سدا میں ہی احسان محبت پر

بس ایک تمنا ہے بس ایک ہی حسرت ہے

سب کچھ ہو فدا میرا سلطان محبت پر

میں جان بھی دے دوں تو نقصان نہیں دل کا

چلتی ہیں مری سانسیں ہر آن محبت پر

ہو جائے خبر تجھ کو کیا چیز محبت ہے

ہے جان لٹانا بھی آسان محبت پر

یہ عشق و محبت تو جنت کی ضمانت ہے

ہو جاؤ ذرا تم بھی قربان محبت پر

دیدارِ محبت بھی معراجِ محبت ہے

سن لیجیے عاشق کا فرمان محبت پر

دل تھام کے سنتے ہیں الفت کے جہاں والے

کہتا ہے غزل جب بھی شایانؔ محبت پر