koi hasti yahan meri sharik-e-gham nahin hoti

koī hastī yahāñ merī sharīk-e-ġham nahīñ hotī

vo ek terī nazar hai jo kabhī barham nahīñ hotī

nahīñ aatī kisī ko maut duniyā-e-mohabbat meñ

charāġh-e-zindagī kī lau yahāñ maddham nahīñ hotī

ummīdeñ TuuT jaatī haiñ sahāre chhūT jaate haiñ

magar terī mohabbat kī tamannā kam nahīñ hotī

nahīñ hotī vafā kī manzileñ āsāñ kabhī us par

mohabbat meñ jo hastī āshnā-e-ġham nahīñ hotī

mere soz-e-darūñ ne aañkh meñ aañsū nahīñ chhoḌe

jahāñ sho.ale bhaḌakte hoñ vahāñ shabnam nahīñ hotī

hameñ duniyā se umīd-e-vafā ho kis liye āḳhir

ye duniyā to kisī kī bhī sharīk-e-ġham nahīñ hotī

ma.āl-e-kār bhī ma.alūm hai jab mujh ko hastī kā

ilāhī ārzū-e-zindagī kyuuñ kam nahīñ hotī

kahāñ hotī hai merāj-e-niyāz-e-bandagī us ko

tare dar par jabīn-e-shauq jas kī ḳham nahīñ hotī

surūr-e-bada-o-irfāñ kabhī hāsil nahīñ hotī

nigāh-e-sāqi-e-mahfil agar paiham nahīñ hotī

guzar jā.ūñgā maiñ hastī kī har dushvār manzil se

kisī darvesh kī nisbat bhī 'sādiq' kam nahīñ hotī

koi hasti yahan meri sharik-e-gham nahin hoti

wo ek teri nazar hai jo kabhi barham nahin hoti

nahin aati kisi ko maut duniya-e-mohabbat mein

charagh-e-zindagi ki lau yahan maddham nahin hoti

ummiden TuT jati hain sahaare chhuT jate hain

magar teri mohabbat ki tamanna kam nahin hoti

nahin hoti wafa ki manzilen aasan kabhi us par

mohabbat mein jo hasti aashna-e-gham nahin hoti

mere soz-e-darun ne aankh mein aansu nahin chhoDe

jahan shoale bhaDakte hon wahan shabnam nahin hoti

hamein duniya se umid-e-wafa ho kis liye aaKHir

ye duniya to kisi ki bhi sharik-e-gham nahin hoti

maal-e-kar bhi malum hai jab mujh ko hasti ka

ilahi aarzu-e-zindagi kyun kam nahin hoti

kahan hoti hai meraj-e-niyaz-e-bandagi us ko

tare dar par jabin-e-shauq jas ki KHam nahin hoti

surur-e-bada-o-irfan kabhi hasil nahin hoti

nigah-e-saqi-e-mahfil agar paiham nahin hoti

guzar jaunga main hasti ki har dushwar manzil se

kisi darwesh ki nisbat bhi 'sadiq' kam nahin hoti