کیا فائدہ ہے یارو اس بے وفائی سے ملنا

کیا فائدہ ہے یارو اس بے وفائی سے ملنا

ہو عار و ننگ جس کو یار آشنا سے ملنا

ملنا ہے اس سے بہتر آئے اگر میسر

ہو جس کے تئیں برابر شاہ و گدا سے ملنا

لائی ہے فصل گل کا مژدہ وہی چمن میں

لازم ہے تجھ کو بلبل باد صبا سے ملنا

معشوق سے بمنت عاشق ملے نہ کیوں کر

بھاتا ہے یار ہی کو ناز و ادا سے ملنا

بے غرض اہل دنیا فقرا سے کب ملے ہیں

مشکل پڑے تو ہووے مشکل کشا سے ملنا

جس کو سفر ہو کرنا رستہ نہ ہووے معلوم

اس کو تو ہے ضرورت کوئی رہنما سے ملنا