تضمین بر غزل مرزا غالؔب:بھرا کرتا ہوں آہیں بے ثباتیٔ گلستاں پر

بھرا کرتا ہوں آہیں بے ثباتیٔ گلستاں پر

مرے آنسو ٹپک پڑتے ہیں انجامِ بہاراں پر

کلیجہ منہ کوآتا ہے سحر کے چاکِ داماں پر

لرزتا ہے مرا دل رحمتِ مہر درخشاں پر

میں وہ قطرہ ہوں شبنم کا جو ہے خار بیاباں پر

محبت کی ہوئی ہے ابتدا میرے فسانے سے

ملا ہے مجھ کو یہ انعام قدرت کے خزانے سے

فرشتے جبکہ تھے معذور بارِ غم اٹھانے سے

فنا تعلیم درس بے خودی ہوں اس زمانے سے

کہ مجنوں لام الف لکھتاتھا دیوارِ دبستاں پر

خزاں نے بھی کیا غمگیں بہاروں نے بھی تڑپایا

نگاہِ شوق پر کیا کیا یہ رنگ بے کسی چھایا

بہت دن تک مرے زخمِ الم نے خون ٹپکایا

مجھے اب دیکھ کر ابر شفق آلودہ یاد آیا

کہ فرقت میں تری آتش برستی تھی گلستاں پر

فنا کی حشر سامانی سے ان کو خوف کیا ہوگا

جفا کی آرزو ہوگی نہ ارمان وفا ہوگا

دل برباد میں حسرت نہ کوئی مدعا ہوگا

بجز پرواز شوق ناز باقی کیا رہا ہوگا

قیامت اک ہوائے تند ہے خاکِ شہیداں پر

عبث کیوں ڈھونڈتا ہے راہ تو بغض وعداوت کی

تپشؔ کیا وجہ پائی اس میں شکوے کی شکایت کی

تجھے کیا غم جنونِ عاشقی کی جو مذت کی

نہ لڑ ناصح سے غالب کیا ہوا جو اس نے شدت کی

کہ تیرا بھی تو آخر زور چلتا ہے گریباں پر