یہ مانا میں نے کہ اس شوخ کو حجاب نہیں

یہ مانا میں نے کہ اس شوخ کو حجاب نہیں

کروں میں صبر مجھے بھی تو اتنی تاب نہیں

عبث خیال ہے اے چاند ہمسری کا تجھے

مقابل اس کی جبیں کے تو آفتاب نہیں

نکل بھی آیا خط ان کے عذارِ گلگوں پر

ہمارے خط کا مگر آج تک جواب نہیں

گذر رہی ہے عجب لطف سے ہمارے عمر

اگر شراب میسر ہوئی کباب نہیں

یہ بعد مرگ مرے دل پہ ہاتھ رکھ کے کہا

بس اب یہ چین میں ہے اس کو اضطراب نہیں

ہزار بار لکھوں خط اگر انہیں محبوبؔ

مرے سوال کا دیتے وہ کچھ جواب نہیں