ghani hai dil do-alam se faraghat usko kahte hain

ġhanī hai dil do-ālam se farāġhat us ko kahte haiñ

hai yād-e-haq faqat dil meñ qanā.at us ko kahte haiñ

milāyā jazba-e-dil ne is adnā meñ us a.alā ko

jise paanā hai bas mushkil karāmat us ko kahte haiñ

banāyā jab ki aadam ko kiyā dam apnā dam us meñ

batāyā rāz-e-dil saarā ḳhilāfat us ko kahte haiñ

mere chehre pe jab aks-e-ruḳh-e-pur-nūr paḌtā hai

pata rahtā nahīñ merā sarāyat us ko kahte haiñ

visāl-e-lam-yazal ne kar diyā be-hirs-o-be-hamatā

chhuTe ḳhud se aur aalam se farāġhat us ko kahte haiñ

tan-o-jāñ sab unhīñ kā hai nisār un par kareñ kyā ham

mohabbat ne kiyā yaktā vilāyat us ko kahte haiñ

ghani hai dil do-alam se faraghat us ko kahte hain

hai yaad-e-haq faqat dil mein qanaat us ko kahte hain

milaya jazba-e-dil ne is adna mein us aala ko

jise pana hai bas mushkil karamat us ko kahte hain

banaya jab ki aadam ko kiya dam apna dam us mein

bataya raaz-e-dil sara KHilafat us ko kahte hain

mere chehre pe jab aks-e-ruKH-e-pur-nur paDta hai

pata rahta nahin mera sarayat us ko kahte hain

visal-e-lam-yazal ne kar diya be-hirs-o-be-hamata

chhuTe KHud se aur aalam se faraghat us ko kahte hain

tan-o-jaan sab unhin ka hai nisar un par karen kya hum

mohabbat ne kiya yakta wilayat us ko kahte hain