کیوں لگائیں دل کسی خود سر سے ہم

کیوں لگائیں دل کسی خود سر سے ہم

کیوں لڑائیں سنگ کو گوہر سے ہم

زندگی دو دن کی ہم کو ہے وبال

تنگ آئے ہیں دل مضطر سے ہم

غربتِ راہ عدم در پیش ہے

چھوٹتا ہے ہم سے گھر اور گھر سے ہم

شرم آتی ہے گنہ سے اے خدا

منہ چھپا لیں دامن محشر سے ہم

طے کریں گے کس طرح راہِ عدم

اٹھ نہیں سکتے ہیں جب بستر سے ہم

سہتے جاتے ہیں بتوں کے ظلم وجور

کچھ نہیں کہتے خد اکے ڈر سے ہم

طے کیا ہے محشر آشوبِ وفا

کیا ڈریں گے شورشِ محشر سے ہم

اس میں ڈوبے گا سفینہ عمر کا

ڈر رہے ہیں جوشِ چشم تر سے ہم

منزلِ الفت بہت دشوار ہے

راہ طے کرتے ہیں اپنے سر سے ہم

ہوگئے خاموش صورت دیکھ کر

کچھ تو سمجھے آپ کے تیور سے ہم

جان دی مسعودؔ آخر ہجر میں

ہوگئے قربان بھی ان پر سے ہم