جنوں نیرنگ دکھلائے اگر آہستہ آہستہ

جنوں نیرنگ دکھلائے اگر آہستہ آہستہ

بنے رشکِ بیاباں میرا گھر آہستہ آہستہ

جفا کیسی ستم کیسا نہ دل قابو میں دیکھو گے

مرے نالوں میں جب ہوگا اثر آہستہ آہستہ

مزہ جب ہے کہ نکلے جان بھی عاشق کی تھم تھم کر

ذرا خنجر چلے بیداد گر آہستہ آہستہ

نمود دورِ پیری ہے گیا موسم جوانی کا

ہوئی ہے عمر فانی کی سحر آہستہ آہستہ

ہوائے دامنِ جاناں سے ابتر ہو گئی حالت

بڑھا آخر مرا دردِ جگر آہستہ آہستہ

بنا دے گی زمانے بھر کی مجھ سے بد گماں آخر

ڈبو دے گی مجھے یہ چشمِ تر آہستہ آہستہ

قفس کو لے کے اڑ جائیں گے اے صیاد ہم اک دن

نکلتے آ رہے ہیں بال و پر آہستہ آہستہ

ابھی کچھ دن تو ہم نخلِ تمنا سینچتے جائیں

یہ ہو جائے گا بار آور شجر آہستہ آہستہ

دعا مسعودؔ روزِ وصل کی کرتےر ہو دل سے

شبِ فرقت کی بھی ہوگی سحر آہستہ آہستہ