qahr-e-haalat se yun KHud ko bachae rakhiye

qahr-e-hālāt se yuuñ ḳhud ko bachā.e rakhiye

āsmāñ vaale se ummīd lagā.e rakhiye

jis ke jalvoñ se mah-o-mehr meñ tābānī hai

us kī yādoñ kā diyā dil meñ jalā.e rakhiye

maar Daale na mujhe jaur-o-sitam kā sūraj

dāman-e-lutf-o-'ināyat meñ chhupā.e rakhiye

har ghaḌī mere tasavvur meñ hai ik paikar-e-nūr

duur hī mujh se ye zulmāt ke saa.e rakhiye

dīn-o-īmāñ ke luTere haiñ yahāñ har jānib

un se har haal meñ apne ko bachā.e rakhiye

aap ke dil meñ hai armān agar ḳhushbū kā

phuul har samt mohabbat ke khilā.e rakhiye

yuuñ na giriye ki hamesha ko nazar jhuk jaa.e

aisā giriye ki nazar apnī uThā.e rakhiye

jin se har lahza milā kartī hai ḳhushbu-e-vafā

kyuuñ na aisoñ ko kaleje se lagā.e rakhiye

yuuñ lage ġham kā hai ehsās vajūd-e-bātil

shādmānī kā vo māhaul banā.e rakhiye

dil kī vīrān havelī meñ sar-e-shām firāq

kHvāb-e-ā.inda kī qindīl jalā.e rakhiye

qahr-e-haalat se yun KHud ko bachae rakhiye

aasman wale se ummid lagae rakhiye

jis ke jalwon se mah-o-mehr mein tabani hai

us ki yaadon ka diya dil mein jalae rakhiye

mar Dale na mujhe jaur-o-sitam ka suraj

daman-e-lutf-o-'inayat mein chhupae rakhiye

har ghaDi mere tasawwur mein hai ek paikar-e-nur

dur hi mujh se ye zulmat ke sae rakhiye

din-o-iman ke luTere hain yahan har jaanib

un se har haal mein apne ko bachae rakhiye

aap ke dil mein hai arman agar KHushbu ka

phul har samt mohabbat ke khilae rakhiye

yun na giriye ki hamesha ko nazar jhuk jae

aisa giriye ki nazar apni uThae rakhiye

jin se har lahza mila karti hai KHushbu-e-wafa

kyun na aison ko kaleje se lagae rakhiye

yun lage gham ka hai ehsas wajud-e-baatil

shadmani ka wo mahaul banae rakhiye

dil ki viran haweli mein sar-e-sham firaq

kHwab-e-ainda ki qindil jalae rakhiye