yun badalne ko duniya badalti rahi

yuuñ badalne ko duniyā badaltī rahī

maiñ tire rāste hī pe chaltī rahī

chāñd niklā sitāre bhī chamkā kiye

ek maiñ ġham meñ karvaT badaltī rahī

sozish-e-ġham se fursat milī kab mujhe

thā muqaddar meñ jalnā so jaltī rahī

mausam-e-hijr thā jo na badlā kabhī

yuuñ badalne ko har rut badaltī rahī

rū-ba-rū mere ye hādisa bhī huā

har haqīqat fasāne meñ Dhaltī rahī

kyuuñ banī jān-levā mirī har adā

terī har baat kyuuñ dil ko khaltī rahī

tujh ko paane kī hasrat meñ ai zindagī

umr bhar sūrat-e-sham.a jaltī rahī

monis-e-shām-e-hijrāñ thā terā hī ġham

jān-e-jāñ maiñ usī se bahaltī rahī

yun badalne ko duniya badalti rahi

main tere raste hi pe chalti rahi

chand nikla sitare bhi chamka kiye

ek main gham mein karwaT badalti rahi

sozish-e-gham se fursat mili kab mujhe

tha muqaddar mein jalna so jalti rahi

mausam-e-hijr tha jo na badla kabhi

yun badalne ko har rut badalti rahi

ru-ba-ru mere ye hadisa bhi hua

har haqiqat fasane mein Dhalti rahi

kyun bani jaan-lewa meri har ada

teri har baat kyun dil ko khalti rahi

tujh ko pane ki hasrat mein ai zindagi

umr bhar surat-e-shama jalti rahi

monis-e-sham-e-hijran tha tera hi gham

jaan-e-jaan main usi se bahalti rahi