but ki manind na apne ko banae rakhna

but kī mānind na apne ko banā.e rakhnā

jis jagah rahnā vahāñ dhuum machā.e rakhnā

ḳhud ko dariyā meñ na qatroñ-sā milā.e rakhnā

munfarid hone kā ehsās dilā.e rakhnā

kaam farzāna-e-duniyā kā nahīñ ai nāseh

parcham-e-’ishq zamāne meñ uThā.e rakhnā

chashm-e-maḳhlūq hai mīzān razā.e maulā

chashm-e-maḳhlūq meñ ḳhud ko na girā.e rakhnā

tujh ko denā ho agar zulmat-e-hijrāñ ko shikast

sham.a bujh jaaye magar dil na bujhā.e rakhnā

qalb-e-kHuddār kī ḳhātir to hai zillat kā sabab

lau sadā us but-e-kāfir se lagā.e rakhnā

jis se miltī ho har ik lahza ġhazal kī ḳhushbū

sahn-e-ehsās meñ vo phuul khilā.e rakhnā

mere dil ko to kisī haal meñ manzūr nahīñ

fikr-e-duniyā meñ tirī yaad bhulā.e rakhnā

but ki manind na apne ko banae rakhna

jis jagah rahna wahan dhum machae rakhna

KHud ko dariya mein na qatron-sa milae rakhna

munfarid hone ka ehsas dilae rakhna

kaam farzana-e-duniya ka nahin ai naseh

parcham-e-’ishq zamane mein uThae rakhna

chashm-e-maKHluq hai mizan razae maula

chashm-e-maKHluq mein KHud ko na girae rakhna

tujh ko dena ho agar zulmat-e-hijran ko shikast

shama bujh jaye magar dil na bujhae rakhna

qalb-e-kHuddar ki KHatir to hai zillat ka sabab

lau sada us but-e-kafir se lagae rakhna

jis se milti ho har ek lahza ghazal ki KHushbu

sahn-e-ehsas mein wo phul khilae rakhna

mere dil ko to kisi haal mein manzur nahin

fikr-e-duniya mein teri yaad bhulae rakhna