na gul-e-bahaar ki shefta na fida-e-sarw sahi hun main

na gul-e-bahār kī shefta na fidā-e-sarv sahī huuñ maiñ

mujhe kyā ġharaz kisī aur se tire vāste hī banī huuñ maiñ

na to ārzū-e-najāt-e-ġham na to justajū-e-nishāt-e-jāñ

ye batā de ai mirī be-ḳhudī ye kahāñ pe aake khaḌī huuñ maiñ

na ho kyuuñ ye jaañ se azīz-tar mirī sajda-gāh-e-vafā hai ye

huā haal jo vo batā.ūñ kyā tire dar se jab bhī uThī huuñ maiñ

mire dil ko terī ḳhabar bhī hai tirī har adā pe nazar bhī hai

kahāñ mujh se duur huā hai tū kahāñ tujh se duur huī huuñ maiñ

mujhe apne husn-e-vajūd se kabhī kar na pā.egā tū judā

tū jahān-e-dil kā jo chāñd hai mirī jaañ tirī chāñdnī huuñ maiñ

mujhe putliyoñ meñ basā.e rakh mujhe apne dil se lagā.e rakh

tirī ārzū-e-hayāt huuñ maiñ burī huuñ yā ki bhalī huuñ maiñ

mirī zindagī se hai munsalik tire ahd-e-māzī kī dāstāñ

tirā āshiyāñ thā kabhī jahāñ usī shāḳh-e-gul kī kalī huuñ maiñ

na gul-e-bahaar ki shefta na fida-e-sarw sahi hun main

mujhe kya gharaz kisi aur se tere waste hi bani hun main

na to aarzu-e-najat-e-gham na to justaju-e-nishat-e-jaan

ye bata de ai meri be-KHudi ye kahan pe aake khaDi hun main

na ho kyun ye jaan se aziz-tar meri sajda-gah-e-wafa hai ye

hua haal jo wo bataun kya tere dar se jab bhi uThi hun main

mere dil ko teri KHabar bhi hai teri har ada pe nazar bhi hai

kahan mujh se dur hua hai tu kahan tujh se dur hui hun main

mujhe apne husn-e-wajud se kabhi kar na paega tu juda

tu jahan-e-dil ka jo chand hai meri jaan teri chandni hun main

mujhe putliyon mein basae rakh mujhe apne dil se lagae rakh

teri aarzu-e-hayat hun main buri hun ya ki bhali hun main

meri zindagi se hai munsalik tere ahd-e-mazi ki dastan

tera aashiyan tha kabhi jahan usi shaKH-e-gul ki kali hun main