raaz-e-husn-o-’ishq jab tujh par ayan ho jaega

rāz-e-husn-o-'ishq jab tujh par ayaañ ho jā.egā

to yaqīnan zindagī kā tarjumāñ ho jā.egā

jab tirā jalva nigāhoñ se nihāñ ho jā.egā

ashk jo Thahrā huā hai vo ravāñ ho jā.egā

ishq meñ jab nutq par qadġhan lagā.ī jā.egī

qissa-e-dil āñkhoñ āñkhoñ meñ bayāñ ho jā.egā

kyā pata thā mausam-e-gul dil pe Dhā.egā sitam

kyā ḳhabar thī mehrbāñ nā-mehrbāñ ho jā.egā

harf-e-muhmal kī tarah maiñ bhī miTā dī jā.ūñgī

lafz-e-lā-yā'nī sā tū bhī be-nishāñ ho jā.egā

mujh pe mashq-e-nāz kar zālim ba-andāz-e-vafā

is bahāne mere dil kā imtihāñ ho jā.egā

aisā lagtā thā kahāñ bachpan meñ us ko dekh kar

fitna-e-dil vo banegā jab javāñ ho jā.egā

kyuuñ fanā-fil-'ishq ye mirā dil-e-muztar na ho

terī ḳhātir miTne vaalā jāvedāñ ho jā.egā

hasrat-e-qatra hai ham-āhañgī-e-mauj-e-muhīt

jab ye hasrat puurī hogī be-karāñ ho jā.egā

raaz-e-husn-o-'ishq jab tujh par ayan ho jaega

to yaqinan zindagi ka tarjuman ho jaega

jab tera jalwa nigahon se nihan ho jaega

ashk jo Thahra hua hai wo rawan ho jaega

ishq mein jab nutq par qadghan lagai jaegi

qissa-e-dil aankhon aankhon mein bayan ho jaega

kya pata tha mausam-e-gul dil pe Dhaega sitam

kya KHabar thi mehrban na-mehrban ho jaega

harf-e-muhmal ki tarah main bhi miTa di jaungi

lafz-e-la-ya'ni sa tu bhi be-nishan ho jaega

mujh pe mashq-e-naz kar zalim ba-andaz-e-wafa

is bahane mere dil ka imtihan ho jaega

aisa lagta tha kahan bachpan mein us ko dekh kar

fitna-e-dil wo banega jab jawan ho jaega

kyun fana-fil-'ishq ye mera dil-e-muztar na ho

teri KHatir miTne wala jawedan ho jaega

hasrat-e-qatra hai ham-ahangi-e-mauj-e-muhit

jab ye hasrat puri hogi be-karan ho jaega