jalwa-e-mah-e-mubin phul ki rangat jaisi

jalva-e-māh-e-mubīñ phuul kī rañgat jaisī

koī sūrat na milī aap kī sūrat jaisī

rāt-bhar sham.a bhī chup-chāp jalī jaatī thī

maiñ bhī ḳhāmosh thī us bazm meñ mūrat jaisī

kūcha-e-yār meñ rāhat na mile kyuuñ dil ko

hai vahāñ āb-o-havā gulshan-e-jannat jaisī

kyuuñ adāvat pe tirī ho na mohabbat kā gumāñ

ye adāvat bhī tirī jab hai mohabbat jaisī

mujh ko yaad aa.e bahut agle dinoñ ke qisse

kaan meñ aa.ī sadā jab bhī tilāvat jaisī

kuchh dinoñ se hai ajab haal mirā ai hamdam

dil meñ uThtī hai ḳhalish ahd-e-mohabbat jaisī

vo nazar aaj bhī pur-lutf hai merī ḳhātir

avvalīñ shaam mulāqāt kī saa.at jaisī

jalwa-e-mah-e-mubin phul ki rangat jaisi

koi surat na mili aap ki surat jaisi

raat-bhar shama bhi chup-chap jali jati thi

main bhi KHamosh thi us bazm mein murat jaisi

kucha-e-yar mein rahat na mile kyun dil ko

hai wahan aab-o-hawa gulshan-e-jannat jaisi

kyun adawat pe teri ho na mohabbat ka guman

ye adawat bhi teri jab hai mohabbat jaisi

mujh ko yaad aae bahut agle dinon ke qisse

kan mein aai sada jab bhi tilawat jaisi

kuchh dinon se hai ajab haal mera ai hamdam

dil mein uThti hai KHalish ahd-e-mohabbat jaisi

wo nazar aaj bhi pur-lutf hai meri KHatir

awwalin sham mulaqat ki saat jaisi