جلوۂ ماہ مبیں پھول کی رنگت جیسی

جلوۂ ماہ مبیں پھول کی رنگت جیسی

کوئی صورت نہ ملی آپ کی صورت جیسی

رات بھر شمع بھی چپ چاپ جلی جاتی تھی

میں بھی خاموش تھی اس بزم میں مورت جیسی

کوچۂ یار میں راحت نہ ملے کیوں دل کو

ہے وہاں آب و ہوا گلشن جنت جیسی

کیوں عداوت پہ تری ہو نہ محبت کا گماں

حال عداوت بھی تری جب ہے محبت جیسی

مجھ کو یاد آئے بہت اگلے دنوں کے قصے

کان میں آئی صدا جب بھی تلاوت جیسی

کچھ دنوں سے ہے عجب حال مرا اے ہمدم

دل میں اٹھتی ہے خلش عہد محبت جیسی

وہ نظر آج بھی پر لطف ہے میری خاطر

اولیں شام ملاقات کی ساعت جیسی