hum ghalat ehtimal rakhte the

ham ġhalat ehtimāl rakhte the

tujh se kyā kyā ḳhayāl rakhte the

na sunā tū ne kyā kahīñ zālim

varna ham arz-e-hāl rakhte the

na rahā intizār bhī ai yaas

ham umīd-e-visāl rakhte the

jauhar-e-ā.īna ne dikhlāyā

sāda-rū jo kamāl rakhte the

na sunā thā kaso ne ye to ġhurūr

sabhī dilbar jamāl rakhte the

aah vo din ga.e ki ham bhī 'asar'

dil ko apne sambhāl rakhte the

hum ghalat ehtimal rakhte the

tujh se kya kya KHayal rakhte the

na suna tu ne kya kahin zalim

warna hum arz-e-haal rakhte the

na raha intizar bhi ai yas

hum umid-e-visal rakhte the

jauhar-e-aina ne dikhlaya

sada-ru jo kamal rakhte the

na suna tha kaso ne ye to ghurur

sabhi dilbar jamal rakhte the

aah wo din gae ki hum bhi 'asar'

dil ko apne sambhaal rakhte the