مرا دل عجیب شے ہے نہ کر اس سے استفادہ

مرا دل عجیب شے ہے نہ کر اس سے استفادہ

کبھی خوش کبھی مکدر کبھی کم کبھی زیادہ

مرے رہبروں سے پوچھو یہ کہاں کی رہبری ہے

نہ کہیں نمود منزل نہ کہیں نِشانِ جادہ

کوئی حادثہ ہی ہوگا جو انہیں ملا کے رکھ دے

ترا حسن عرش پیما مرا عشق پاپیادہ

مری خلوتوں کی رونق مری جلوتوں کی زینت

تری ہر ادائے رنگیں ترا حسن صاف و سادہ

مجھے اب پتہ چلا ہے کہ وہ مائل کرم تھے

مجھے بزم میں جو دیکھا تو بدل گیا ارادہ