مرا حال تو جانتا ہے کما ہی کہ میں تھک گیا ہوں بہت تھک گیا ہوں

مرا حال تو جانتا ہے کما ہی کہ میں تھک گیا ہوں بہت تھک گیا ہوں

کرم کر مرے حال پر یا الٰہی کہ میں تھک گیا ہوں بہت تھک گیا ہوں

اب اکتا گیا ہوں اب اکتا گیا ہوں، بڑی دیر سے دیکھتا آ رہا ہوں

یہ دن کا اجالا، یہ شب کی سیاہی کہ میں تھک گیا ہوں بہت تھک گیا ہوں

یہ دنیا تری خوبصورت ہے لیکن وفاؤں سے عاری جفاؤں سے بھاری

ہر اک شے مسافر ہر اک چیز راہی کہ میں تھک گیا ہوں بہت تھک گیا ہوں

یہی ایک نغمہ ہے سب کے لبوں پر یہی راگ گاتی ہے مخلوقِ عالم

ترے چاند تارے ترے مرغ و ماہی کہ میں تھک گیا ہوں بہت تھک گیا ہوں

مری روح کا کرب ڈستا ہے مجھ کو تر اکِ نظر کا طلب گار ہوں میں

نہ دنیا کی دولت نہ عالم پناہی کہ میں تھک گیا ہوں بہت تھک گیا ہوں

نہ اب نیم شب کی دعاؤں میں رقت نہ ذوقِ حضوری نہ احساس دوری

نہ اب لذتِ نالۂ صبح گاہی کہ میں تھک گیا ہوں بہت تھک گیا ہوں

مجھے اس اذیت سےآزاد کر دے نیا ولولہ دے نئی زندگی دے

نئی زِندگی کی نئی سر براہی کہ میں تھک گیا ہوں بہت تھک گیا ہوں

ہزاروں برس کی مسافت کو میں نے فقط چند لمحوں میں طے کر لیا ہے

مرا ہر رواں دے رہا ہے گواہی کہ میں تھک گیا ہوں بہت تھک گیا ہوں