صورت اُن کی سورۂ قرآن ہے

صورت اُن کی سورۂ قرآن ہے

ہے وہ میرا دین یہ ایمان ہے

وصف عارض کون کر سکتا ہے اب

دنگ میں ہوں آئینہ حیران ہے

کیوں نہ رکھے خلق آنکھوں میں تجھے

جان من تو اور ہی انسان ہے

تم بنو مسجود ہم ساجد بنیں

اے بتو یہ بھی خدا کی شان ہے

بدر کو نسبت ہے کیا رخ سے ترے

ناک ہے منہ پر نہ اس کے کان ہے

کرتےہو اک آن میں لاکھوں ہی خون

ناز کیسا ہے یہ کیسی آن ہے

وصل کی شب ہے مچائیں غل نہ آپ

چار پائی کے لیے بھی کان ہے

وہ خدا کو بھی نہیں دیتا دیت

قاتل اپنا فیضؔ بھی نادان ہے