maza hai zindagani ka agar ho pas dilbar ke

maza hai zindagānī kā agar ho paas dilbar ke

nikal kar vahm-e-hastī se guzar ho paas dilbar ke

nahīñ hai ishq-bāzoñ ko raqīboñ se koī matlab

ruḳh-e-jānāñ pe tū kar ke nazar ho paas dilbar ke

sanam kī be-niyāzī se haiñ Darte ālim-o-fāzil

ḳhudī ko duur kar phir be-ḳhatar ho paas dilbar ke

na ho maiñ tū kī bū hargiz tū aisā saaf ho dil se

tū apne aap se bas bā-ḳhabar ho paas dilbar ke

ye dil se maz.hab-o-millat kā jhagḌā chhoḌ de vaa.iz

jo ho kāfir ho yā momin magar ho paas dilbar ke

vo dilbar duur samjhā hai terī ye ḳhaas ġhaflat hai

agar hai nahno-aqrab kā asar ho paas dilbar ke

uThā de 'mīrāñ' shaah dil se taqāzā vahm-e-dūrī kā

karam altāf se gañj-e-shakar ho paas dilbar ke

maza hai zindagani ka agar ho pas dilbar ke

nikal kar wahm-e-hasti se guzar ho pas dilbar ke

nahin hai ishq-bazon ko raqibon se koi matlab

ruKH-e-jaanan pe tu kar ke nazar ho pas dilbar ke

sanam ki be-niyazi se hain Darte aalim-o-fazil

KHudi ko dur kar phir be-KHatar ho pas dilbar ke

na ho main tu ki bu hargiz tu aisa saf ho dil se

tu apne aap se bas ba-KHabar ho pas dilbar ke

ye dil se mazhab-o-millat ka jhagDa chhoD de waiz

jo ho kafir ho ya momin magar ho pas dilbar ke

wo dilbar dur samjha hai teri ye KHas ghaflat hai

agar hai nahno-aqrab ka asar ho pas dilbar ke

uTha de 'miran' shah dil se taqaza wahm-e-duri ka

karam altaf se ganj-e-shakar ho pas dilbar ke