مزہ ہے زندگانی کا اگر ہو پاس دلبر کے

مزہ ہے زندگانی کا اگر ہو پاس دلبر کے

نکل کر وہم ہستی سے گزر ہو پاس دلبر کے

نہیں ہے عشق بازوں کو رقیبوں سے کوئی مطلب

رخ جاناں پہ تو کر کے نظر ہو پاس دلبر کے

صنم کی بے نیازی سے ہیں ڈرتے عالم و فاضل

خودی کو دور کر پھر بے خطر ہو پاس دلبر کے

نہ ہو میں تو کی بو ہرگز تو ایسا صاف ہو دل سے

تو اپنے آپ سے بس با خبر ہو پاس دلبر کے

یہ دل سے مذہب و ملت کا جھگڑا چھوڑ دے واعظ

جو ہو کافر ہو یا مومن مگر ہو پاس دلبر کے

وہ دلبر دور سمجھا ہے تیری یہ خاص غفلت ہے

اگر ہے نحن اقرب کا اثر ہو پاس دلبر کے

اٹھا دے میراںؔ شاہ دل سے تقاضا وہم دوری کا

کرم الطاف سے گنج شکر ہو پاس دلبر کے