mere dil se koi puchhe ki tum ho aur kya tum ho

mire dil se koī pūchhe ki tum ho aur kyā tum ho

nasīb-e-dushmanāñ ho dushmanoñ kā mudda.ā tum ho

nihāñ ham se hī rahte ho vagarna jā-ba-jā tum ho

guloñ meñ rañg-ārā ġhunchoñ meñ nig.hat-fazā tum ho

nahīñ jab vāsta ham se to phir iġhmāz kaise haiñ

kaaro iġhmāz bhī un se ki jin kī āshnā tum ho

rahā daur-e-jahāñ qāyam kabhī ho jā.egā milnā

hamāre dam meñ dam baaqī hai aur nām-e-ḳhudā tum ho

gire jaate ho nazroñ se mire jī se utarte ho

har ek chashm-e-tamāshā kā tamāshā ho gayā tum ho

vafā par naaz karte ho dikhāo kuchh vafā kar ke

isī begāna-vārī par kaheñ ham bā-vafā tum ho

miloge ham se tum aakar ye sab kahne kī bāteñ haiñ

karoge us kā dil ThanDā ki jis ke mubtalā tum ho

na dete dil kabhī tum ko agar pahle samajh lete

ki aise bevafā ho aur ġharaz ke āshnā tum ho

hamārī aarzū dil kī tumhārī jumbish-e-lab par

tamannā ab bar aatī hai agar kuchh lab-kushā tum ho

na nikle kaam jab tum se tumhārī phir ḳhushāmad kyuuñ

jahāñ meñ aur bhī shāhid haiñ kyā ek dilrubā tum ho

sanam bhī tum nahīñ but bhī nahīñ jo tum ko ham pūjeñ

tumhāre naaz uThā.eñ kyā ḳhudā.ī meñ ḳhudā tum ho

tumhāre ghar se ham nikle ḳhudā ke ghar se tum nikle

tumhīñ īmān se kah do ki kāfir ham haiñ yā tum ho

jab āñkheñ chaar hotī haiñ kudūrat jaatī rahtī hai

nahīñ hote magar tum saaf vo kāfir-adā tum ho

zamāna ko badalne do ḳhudā vo din bhī kar degā

tamāshā dekh lenā ham se karte iltijā tum ho

ye sab uḌ jā.egī naḳhvat gale se mai utarne do

banā deñge tumheñ ham bhī ki kyā the kyā se kyā tum ho

ġhazal ye duur jā.egī likho us rañg se 'rāqim'

ki har insāf-parvar kī zabāñ par marhabā tum ho

mere dil se koi puchhe ki tum ho aur kya tum ho

nasib-e-dushmanan ho dushmanon ka muddaa tum ho

nihan hum se hi rahte ho wagarna ja-ba-ja tum ho

gulon mein rang-ara ghunchon mein nighat-faza tum ho

nahin jab wasta hum se to phir ighmaz kaise hain

karo ighmaz bhi un se ki jin ki aashna tum ho

raha daur-e-jahan qayam kabhi ho jaega milna

hamare dam mein dam baqi hai aur nam-e-KHuda tum ho

gire jate ho nazron se mere ji se utarte ho

har ek chashm-e-tamasha ka tamasha ho gaya tum ho

wafa par naz karte ho dikhao kuchh wafa kar ke

isi begana-wari par kahen hum ba-wafa tum ho

miloge hum se tum aakar ye sab kahne ki baaten hain

karoge us ka dil ThanDa ki jis ke mubtala tum ho

na dete dil kabhi tum ko agar pahle samajh lete

ki aise bewafa ho aur gharaz ke aashna tum ho

hamari aarzu dil ki tumhaari jumbish-e-lab par

tamanna ab bar aati hai agar kuchh lab-kusha tum ho

na nikle kaam jab tum se tumhaari phir KHushamad kyun

jahan mein aur bhi shahid hain kya ek dilruba tum ho

sanam bhi tum nahin but bhi nahin jo tum ko hum pujen

tumhaare naz uThaen kya KHudai mein KHuda tum ho

tumhaare ghar se hum nikle KHuda ke ghar se tum nikle

tumhin iman se kah do ki kafir hum hain ya tum ho

jab aankhen chaar hoti hain kudurat jati rahti hai

nahin hote magar tum saf wo kafir-ada tum ho

zamana ko badalne do KHuda wo din bhi kar dega

tamasha dekh lena hum se karte iltija tum ho

ye sab uD jaegi naKHwat gale se mai utarne do

bana denge tumhein hum bhi ki kya the kya se kya tum ho

ghazal ye dur jaegi likho us rang se 'raqim'

ki har insaf-parwar ki zaban par marhaba tum ho