meri shaeri meri zindagi meri bazm-e-sher-o-suKHan mein aa

mirī shā.erī mirī zindagī mirī bazm-e-sher-o-suḳhan meñ aa

mirī bekalī kī bahār ban mire ujḌe dil ke chaman meñ aa

mirī raat kī hai tu chāñdnī mire din kī tu hī to dhuup hai

mire dil kā tu hī hai aasrā mirī saañs kī tu thakan meñ aa

mirī raah meñ haiñ musībateñ mirī manziloñ pe nigāh hai

mirī uljhanoñ ko sañvār de mire zaḳhm-e-dil kī chhban meñ aa

abhī daldaloñ meñ samāj hai abhī zālimoñ hī kā raaj hai

maiñ to ranj-o-ġham kā shikār huuñ mirī himmatoñ kī shikan meñ aa

mire lab pe aaj bhī mohr hai mirā dil to ab bhī ġhulām hai

mirī ḳhāmushī kī zabān ban mire josh-e-dil kī lagan meñ aa

hai adū-e-jāñ mirā āsmāñ ye zamīñ bhī mujh se ḳhilāf hai

mirī badliyoñ ko tu chiir de nayā chāñd le ke gagan meñ aa

jo ġharīb dil ko baḌhā sake jo ghamanD sar ko jhukā sake

mirī ārzū-e-nasīb ban mirī lekhnī ke tu fan meñ aa

mire nāvakoñ kī haiñ niyyateñ mirī bahr-e-ġham meñ vafāt ho

mirī naav mauj meñ thaam le mire sāhiloñ ke phaban meñ aa

mirī turbatoñ meñ na dam rahā mirī hasratoñ meñ na jaan hai

mire hosh kā tu charāġh ban mirī raushnī kī kiran meñ aa

meri shaeri meri zindagi meri bazm-e-sher-o-suKHan mein aa

meri bekali ki bahaar ban mere ujDe dil ke chaman mein aa

meri raat ki hai tu chandni mere din ki tu hi to dhup hai

mere dil ka tu hi hai aasra meri sans ki tu thakan mein aa

meri rah mein hain musibaten meri manzilon pe nigah hai

meri uljhanon ko sanwar de mere zaKHm-e-dil ki chhban mein aa

abhi daldalon mein samaj hai abhi zalimon hi ka raj hai

main to ranj-o-gham ka shikar hun meri himmaton ki shikan mein aa

mere lab pe aaj bhi mohr hai mera dil to ab bhi ghulam hai

meri KHamushi ki zaban ban mere josh-e-dil ki lagan mein aa

hai adu-e-jaan mera aasman ye zamin bhi mujh se KHilaf hai

meri badliyon ko tu chir de naya chand le ke gagan mein aa

jo gharib dil ko baDha sake jo ghamanD sar ko jhuka sake

meri aarzu-e-nasib ban meri lekhni ke tu fan mein aa

mere nawakon ki hain niyyaten meri bahr-e-gham mein wafat ho

meri naw mauj mein tham le mere sahilon ke phaban mein aa

meri turbaton mein na dam raha meri hasraton mein na jaan hai

mere hosh ka tu charagh ban meri raushni ki kiran mein aa